Penaa So’ Todi’
Den misa’ pia disang so’ Todi’. Iate so’ Todi’, manarang sia pa’barani, mentu' tau nasembangngibang kada! Sebelum male merantau napepasannimi nene’na, ne’ Sulo kumua: “O ampo, maleko ussalongi te lino. Melada’ meloko anna maluangan batu ba’tangmu, anna masindung painaammu, anna mupemadionganni tu penaammu. Sia melada’ko ussuka’ bongi, umpeagi malillin. Ammu manarang untandai simpona manuk, ammu pande umbille ubanna kayo bulan!”
Iatonna mangkamo rangi so’ Todi’ tu pepasanna nene’na, malemi merantau.
Sangpulo taun lendu’na, anna sulemo te so’ Todi’ umpellambi’ lamunan lolona. Den misa’ karuen nasipa’kada-kadami sule ne’ Sulo tu so’ Todi’. Ma’dokkomi toda soladuai do to’ alang simborrok-borrok kopi mamming:
So’ Todi’: “O Nene’!”
Ne’ Sulo : “Apamora ampo?”
So’ Todi’ : “Iatongku latampe tondok tonnanu, misedananna’ kada kumua lamelada’ melona’, anna maluangan batu ba’tangku anna madiongan penaangku. Sia lamelada’ melona’ angku malute ussuka’ bongi malillin, angku pande umbille ubanna kayo bulan. Totemo, malutemo’ ussuka’malillin, pandemo’ umbille ubanna kayo bulan. Apa lendu’ masussanna tu misanga ma’pamadiongan penaa sia ma’pamaluangan batu ba’tang. Sangpulomo taunna lendu’, tangkulambi’pa tu misanganna!”
Ne’ Sulo : “Ampo, apara tu musanga kamanarangan, umbara susi pangampa’mu tu umbille ubanna kayo bulan, ussuka’ bongi malillin?”
So’ Todi’ : “Eee, susi te nene’, iatu kamanarangan ko bu’dak apa ditandai! Ditandai nasang tu mentu’ apa! Maluteki’ untiro kakadakeanna tau! Pandeki’ tandai pakenana tau!
Ne’ Sulo : “Na matumbami to ke mutandaimi?”
So’ Todi’ : “Iangku manarang to ko kuntandai tu apa, na tae’natandai tu to senga’! Iatongku tandaimi kumua tae’natandai to senga’ tu kutandainna ko tae’pissanmo kutandai tu misang ‘ma’pemadiongan penaa sia ma’pemaluangan batu ba’tang. Saba’ kutandai aku na tae’ ia natandai tau!”
Ne’ Sulo : “Ee, ampokue! Tae’raia musalah! Tonganbangsia ia tu pangampa’mu! Apa tangganna’pa! Tangmalesopa dakarammu!”
So’ Todi’ : “Umbamisanga ne’?”
Ne’ Sulo : “Iamora tamelada’ belanna ditandai kumua tangditandaipa tu apa. Tae’ ia tau manarang! Tae’ dukaia tau baga! Iari naden kumua tau dolo untandai, sia tau undi untandai tu apa! Saba’ atturia tu umpasisaa’i. Iatu to dolo untandai dikua to manarang! Na iatu to undinna nasanga tau baga, apa te’ ia nasusi to ampo! Passanga salingri ia to! Saba’ mentu’ tau, sia mentu’ apa bisa dinai melada’. Yodukamai to maro bisa dinai melada’!
Tae’raia na sala tu ampo ke iatu kamanarangan mupellambi’, belanna dao potok kamanarangan lamulambi’ tu kamadiongan penaa, lamulambi’ tu kamaluangan batu ba’tang!
Kappa sangattu’ so’ Todi’ pematiroi wai kopi lan sangkiri’na. Apa natole mekutana,
So’ Todi’ : “O nene’!”
Ne’ Sulo : “Apara ampo?”
So’ Todi’ : “Na umbalakukua untandai kumua maluanganmo batu ba’tangku?”
Ne’ Sulo : “Iamo namaluangan batu ba’tangmu ke meloi tu penaammu. Penaa melomuri lamupake melada’. Ianna melo lan tu penaammu, malolo malena tu tengka ke’de’mu! Ianna malolo bulo sanglampa tu penaammu lamutiro tu kamarendenganna tu sangsiuluranmu. Ammu pendau’I tu salebu’na langi’, mupakaloloi tu garonto’ ra’ba!
Salama’ allo minggu siulu’ solanasang!
Catatan Gambar Hanya Pemanis
Sumber: Kiriman Hardaely Palloan dalam Grup Ulelean Pare dan Legenda Toraja facebook
Baca Juga Dongeng Sebelum Tidur
RAPPEN
0 komentar:
Post a Comment