Cerita Rakyat Orang Toraja : Seredukung Sola Masapinna

Seredukung Sola Masapi

Den misa’  pia disanga Seredukung. Keallo-keallo male bang te
Seredukung manglaa tedong. Den sangallo anna male ullamban salu
umpakande tedongna. Tae’ namasai saemi tu uran kamban
naurunganni kendek tu uai diong salu. Tonna makaroenmo
narambami tu tedongna la sule lako banuanna. Tirambanmi tonna
saemo lako tu salu la nalambanni belanna tarru’ budamo tu uai diong
salu sia tang naatta la unnorongi. Tumangi’mi do randanan belanna
lamban nasangmo lian tu pangkambi’ na.
Tae’ namasai kendekmi diong mai salu tu masapi anna kutanai tu
Seredukung, nakua:”Ammu tumangi’ra.” Mebalimi tu Seredukung
nakua: “Tang kuatta la ullambannj te salu anna lamban nasangmo tu
pangkambi’ku.” Ma’kadami tinde masapi ñakua: “Ma’dinko
kupalamban, apa la mubenna’ kandemu pira’ ke saeoko mangkambi’.”
Mebali tu Seredukung nakua: “lo, palambanmo. “ Sumpandanmi tinde
masapi kapua anna ampangngi tu uai nalamban tu Seredukung. Tonna
rampomo lako banua tu Seredukung, nakuami lako indo’na: “La
umbaa bangmo’ kandeku ke malena’ mangkambi’ keallo. Tae
natandai indo’na kumua ia tu kandena male napakandean masapi
mangka umpa1ambanni. Samadoko-dokona bangmi te Seredukung.
Sipa’kada-kadami tu indo’na sola ambe’na nakua: “Matumbari tinde
pia anna samadoko-dokonamora namale sia umbaa bo’bo’na keallo.”
Apa den pissan naundi tu ambe’na umperandanni, natiroi ambe’na tu
Seredukung umbaa bo’bo’na rokko biring salu anna massengo-sengo
nakua:


“Andullungku diong salu
masapi diong to’ wai 
kendekko kande bo’bo’ku 
maiko anta sidua 
mangka dibati bumbungan 
dibo1loi siling-siling
pangandu’ makko to Duri.”

Kendekmi diong mai salu tu masapi anna kandei tu kandena
Seredukung. Mangkato sulemi tu masapi rokko salu anna
Seredukung untiro tedongna. Mangnga bangmi tu ambe’na untiroi sia
mane natandairi kumua posala’ madodong tu Seredukung belanna
naben masapi tu kandena.
sulemi tu ambe’na lako banua napokadanni indo’na Seredukung tu
patirona. Mabongi to nakuami tu ambena Seredukung lako bainena:
“Benni toda seppa sia bayu melo te Seredukung, mimale masiang
mengkita sola dua lako to ma’bugi’, na akumora male mangkambi’.”
Manoka tu Seredukung apa undinna moraimi tonna naran-naranmi indo’
ambe’na. Masiang dio mai malemi tu Seredukung sola indo’na untiro to
mabugi’. latonna malemo tu Seredukung sola indo’na, male dukami tu
ambe’na lako to’ biring salu nanii kendek masapinna Seredukung. latonna
saemo lako massengo-sengomi susi tu sengona Seredukung nakua :

“Andullungku diong liku . 
masapi diong to’ wai 
kendekko kande bo’bo’ku 
maiko anta sidua 
mangka dibati bumbungan 
dibolloi si1ing-si1ing 
pangandu’ makko to Duri.”

Pakalan kendek tongami tu masapi diong mai salu la ungkandei tu kande
biasa dibanni. Attu lato natoe bangmo ambe’na Seredukung tu la’bo’
mataran. Tonna marassan tu masapi ungkandei tu bo’bo nalontokmi
la’bo’ natantang tu ulunna namane ullontok duapi tu kalena. Nabaami
lako banua te masapi anna tollo’i, nanannanni Seredukung sola indo’na
tupira. .
latonna sulemo mengkita tu Seredukung nasuami ambe’na la
kumande, apa mebali tu Seredukung nakua: “Tae’ra angku la kumande,
la laona’ aku dolo umpakande tedongku.” Malemi tu Seredukung anna
baai tu bo’bo’na ma’palurokko salu. Tonna saemo rokko massengomi susi
biasanna nakua:

“Andullungku diong liku 
masapi diong to’ wai 
kendekko kande bo’bo’ku 
maiko anta sidua 
mangka dibati bumbungan,dibolloi siling-siling 
pangandu makko to Duri".


Napeagimi apa tae’mo nakendek tu masapinna diong mai salu. Sulemi
lako banua naamparanni tu buku masapi nananna ambe’na lan pa’ti.
Sengkemi lako ambe’na sola indo’na nakua: “Masapingku pole’ tu male
miala.”
Naalami Seredukuhg tu bukunna namale untananni lako to’
tondon bubun . Tuomi tu buku masapi apa lemo tu tuo diong mai.
Natambaimi indo’na tu Seredukung la kumande apa nakua:
“Namentangkepa tu lemoku.” Tonna mentangkemo tu lemo, nasua omi
indo’na la kumañde, apa nakua: “Namenta’bìpa lemoku.” Mukkun
bangmi mebali susito tu Seredukung tonna menta’bimo, tonna
membuamo sae lako tonna matasakmo tu lemona. Apa tônna
matasakmo tu lemôna metteka’mi langngan lemo anna massengo-sengo
Nakua :

“Iri’-iri’ko angin 
simbo-simboko darinding . 
mangiri’ tama pangala’ 
tama to’ kakayuanna 
digente’ kurra manapa’.”

Sae tonganmi tu angin talimpuru’ anna tibuak tu garonto’ lemo
namale umpettiaranni angin sola Seredukung. Undi bangmî tu indo’na
sola ambe’na unnulai’, apa tae’mo nalambi’i naurunganni sule lo’bang
lako banuanna. Katampakanna nabaa tongan angin tu Seredukung
tama pangala’ sola garonto’ lemona anna torro lan.
Randukmi tu bua lemona Seredukung naniî bulawan lan ke
dibakkaimi, naurunganni mendadi sugi’ tu Seredukung sia untanan
pasa’ lan pangala’. Mukkunmi buda tau sae ma’pasa’. Napasanmi Seredukung lako to ma’pasa’ kumua anna sae tu indo’ ambe’na. Sae
tonganmi tu indo’ ambe’na, anna randuk attu iato torromi tu indo’
ambe’na sola Seredukung. Torro manamanmi tu katuoanna
napapayan tongan tu kasikamaseanna....(copyright HTP)
Sumber dari Group Facebook Ulelean Pare, Mitos dan legenda Toraya